ظلمه الليل
لان ظلمه الليل وتفضحه النجوم
ما يريد يعيش وياها بسلم
والنجم لو طاح من بخت الجهال
لأن تصعد للسما وما تنرجم
يا عصافير الصبح لا تزقزقين
لا يفز الليل واحنا بلا نجم
اشتبكت الاصوات من كثر الضجيج
وبالحچي المبيوگ تتباها الزلم
الضفادع نافست كل عندليب
لأن مو كلمن يسمعك يفتهم
والبلابل قلدت صوت النهيق
حتى تفتك من قفصها وتنهزم
ودفنت الراس النعامه بمستحاه
لان طاروا بالسما الاصغر حجم
وعدنا اوادم لو تحس مثل النعام
تندفن من راسها لحد الجدم
المناجل حدت سنون الحصاد
السنبله يصوفر وجهها وتنعدم
ويا ثقه وياصح تريد
ويا خشب بالنار ما ظل يلتهم
انقلبت الدنيا وعكس ظلت تدور
وخربت وخربت بعد ما تنفهم
الارانب للأسد تنصب كمين
والفراشه توحشت صارت تسم
والجوارح تزحف وتعجز تطير
والزواحف بالكواكب تصطدم
والشمس گصت گصايبها الحرير
حتى لا جاهل يجرها وتنلزم
وماكو بالدنيا اخو يشد ظهر اخوه
صرنا حتى من الورق نصنع حزم
كلشي صار بهالوكت ضد الفقير
حتى نوع الموت واسلوب الشتم
الاعمى يفرح بالحلم لان بيه يشوف
والفگر من يعمى ما يحلم حلم
وانهجم بيتك تگلي وبيت ابوك
احنا عدنا بيوت حتى تنهجم
شگد ركضنا وما لحگنا السلحفات
هي تلبس بيت واحنا بلا هدم
والافاعي بليا سم بس ما تخاف
لو نسويها حبل هم تبتسم
تدري ما نحتاج لأحبال السطوح
شما غسلنا الثوب ينشر ع الجسم
التذاكر بيدنا وفات القطار
ومن شفت بيه الفرح ظل ينعدم
توسلت بالدنيا بس احلم حلم
گالت احلم وارتكب اخر اثم
حلمت جسرين بس متحدبات
وظالم اليسحگ عليهن يبتسم
گالو الجسرين ظهر امك وابوك
تحدبن والضيم يهدمهن هدم